انا محترف.. إذا أنا مليونير!

الاحتراف في كرة القدم أصبح سبوبة كبيرة ومصدر غني للاعبين واصبح هؤلاء اللاعبون هم قدوة شباب المدارس في ان يلعبوا كرة القدم ويحترفوا ويركبوا أفخر السيارات ويسكنوا افخر الفيلات والشقق المطلة علي النيل وأصبحت لغة الاحتراف هي اللغة الرسمية في عالم كرة القدم ونشأ عنها لغة البزنس.
وما إن عرفت المدام قصة الاحتراف واثمان اللاعبين التي وصلت للملايين وتتهافت عليهم الأندية.. فجاءت لي وقد علا وجهها تكشيره كبيرة شاهدت من خلالها جبال الهمالايا وجبال الألب وجبل عتاقة وأحمرت عيناها.. حتي تصورت ان هناك قردا جاءني بظهره!
وقالت المدام بصوت أجش شوف بقي يافالح لازم تشوف حل مع المنيل أبنك ده.. الواد باظ وانحرف وقاعد يذاكر.. ومش راضي ينزل يلعب كرة في الشارع.. ايه يا اخويا العيال بتوع اليومين دول!
قلت: طب ده كويس يامدام.. العلم نور وياريتك تفرحي له.. بدل مايصيع.. لايافالح حياخذ مؤهل حيعمل بيه ايه حينضم لطابور العاطلين.. وان اشتغل حيشتغل بكام!
انما بقي لو لعب كورة.. حيحترف بالملايين وحياخد ألوفات وأرانب وبكاوي بالدولار واليورو والاسترليني.. ويطلع في التليفزيونات ويبقي صورته في كل الجرايد والمجلات.
وحيفضل ينتقل من نادي لنادي وسعره يزيد كمان حيعينه وزير البترول في شركة بترول ومرتبة يبقي بالالوفات ولاشهادة ولادياولو يمقق عينيه في المذاكرة والامتحانات .. والذي منه وأخيرا يطلع عاطل علي درجة بكالوريوس..
المهم يامدام عنده الموهبة والا.. لاوحينفع في الكورة ولا لاطال بلح الشام ولا عنب اليمن؟.
مش مهم موهبة ايه.. المهم يلعب ويجري ونجيبله مدرب يعلمه الاصول. وعلي فكره المدرب اللي حنجيبه له حيبقي أرخص من الدروس الخصوصية اللي شافطة الميزانية..!
­طب والعلم يادمدام.!
­ العلم في الكراس مش في الراس.. وكفاية أهو أخد الاعدادية وكفاية لحد كده عاوزين الواد يقف علي وش الدنيا وتجري وراه البرامج التليفزيونية.. ويستضيفوني علي اني امه اللي ربته وكبرته.. وكنت بارضعه في ملعب الكورة.. واتعلم المشي في تراك الملعب.. ويا ماسهرت معاه وهو بيتعلم أصول البزنس!
طب وانتي مالك.. مالي ازاي ملت ماتعدلت!
انا حابقي ام النجم الكبير.. والواد حيغرف من الاندية وحيحط في جيوبي.. فذقوم خلي ا لواد يسيب المذاكرة وينزل يلعب في الشارع والغي الدروس الحصوصية.. واتعاقد مع مدرب خصوصي وشوف حصته بكام ويعلم الواد ازاي يقف موقف المتسلل.. وازاي يضرب الحكم ويبقي اناني في اللعب عشان هو اللي يظهر في الفريق وتتسلط عليه الاضواء. والاندية المحلية والاجنبية تجري وراه.. ومن ناحيتي حلم نسوان الحته كلها ونعمل له شو ومنظر في المباريات بشوية اغاني.. له.. يابلاميطة ياملك يا ابورجل زمبلك.. نتفق مع شوية مذيعين اللي بيروحوا يتعشوا عند المصادر كباب وكفته ولحمة كلاب يعملوا معاه شوية لقاءات ويلمعوه ونعمل له شعبية كبيرة تقوم الاندية كلها تجري وراه.. ونرفع سعره لاعلي سعر.. وتمشي يا ابوالنجوم!
قلت امري لله وطلبت من بلاميطة يبطل مذاكرة وينزل يلعب في الشارع كورة عشان يحترف بالفلوس.. الواد رافض الفكرة وقال انا ماليش في اللعب انا عايز ابقي دكتور جامعه ..شخطت فيه المدام جامعة ايه ودكتورايه.. هي دي شغله توكل عيش.. انزل علي الشارع ألعب الكورة!
نزل بلاميطة للشارع واول كوره خبطت فيه ودخلت المرمي.. شافه سمسار طلب ضمه لنادي كبير.. قالت أمه. عايزين فيه عشرة مليون يورو.. وفيلا وسيارة وكام اعلان في التليفزيون.. مش عارف السمسار وقع مغمي عليه ليه!